Советот на Општина Штип ја оддржа 26-тата седница на чиј дневен ред, единствена точка беа советничките прашања.

Прашањата кои се поставуваа беа од различен домен, урбанизам, образование, екологија, инфраструктура, проекти и слично. Советниците се интересираа за реализација на одредени инфраструктурни зафати на повеќе улици во градот, за осветлувањето, водоснабдувањето, работата на Јавните претпријатија и слично.

Дискусијата беше умерена и упатуваше на взаемно почитување и соработка во интерес на граѓаните. Меѓу другото, дел од прашањата упатени кон градоначалникот се однесуваа на претстојниот референдум за пренамена на парите од месниот самопридонес:

- Мислам дека треба да се формира некаков тело кое ќе биде иницијатор на референдумот бидејќи ако одиме со комисија можеме да пробиеме одредени законски рокови. Се додека тоа тело не ги заврши работите нема да одиме понатаму. За мене е најважно секој сомнеж, секој проблем кој ќе произлезе и биде претставен од советниците кои ќе учествуваат во тоа тело да биде претходно решен-изјави градоначалникот Алексов.

Тој воедно образложи дека за типот на брана кој се предлага ќе биде извршена корекција на постојниот проект. Исто така напомена дека се работи на соодветно решение за улицата „Ванчо Прке“ да биде претворена во пешачка зона, со можност за реализрање на подземен тунел со кој двонасочниот сообраќај останува како опција. Исто така одговараше на прашања поврзани со неколку улици во градот, за состојбата со буџетот за кој кажа дека во моментов е стабилизиран и покрај отплатата на ратите од кредитите кои не можеше да ги сервисира ЈП „Исар“.