Вчера во Скопје (хотел Континентал) се одржа работна средба за пет општини од Македонија (меѓу кои и Штип) кои добија подршка од УСАИД како дел од проектот за добивање на кредитен рејтинг од агенцијата Moody’s Investor Service.

За време на средбата беше презентиран тимот кој ќе соработува со општините во процесот на изготвување на анализите за добивање на кредитниот рејтинг а беше опишан и самиот процес и утврдени главните рокови во текот на процесот.

Во рамките на средбата беа разгледани потребните документи и податоци што општините треба да ги достават до агенцијата за кредитен рејтинг. За таа цел на средбата учествуваа и претставници на општините од секторот финансии и буџет и локален економски развој.

Според кажаното, Општина Штип која е една од петте избрани општини кои е предвидено да добијат кредитен рејтинг, во втората половина на март ќе ја посети тимот кој беше претставен на средбата. Тие ќе одржат стручни средби со претставниците на надлежните одделенија и увид во финансиските параметри потребни за добивање на кредитен рејтинг.

Најдоцна до 10-ти мај 2011, Општина Штип ќе добие кредитен рејтинг по што ќе уследи официјализирање на постапката.