Денес во касарната „Јaне Сандански“ во Штип се оддржа свечена церемонија на враќање на контингент од составот на Првата механизирана пешадиска единица од мировна мисија „ИСАФ“-Авганистан. Согласно програмата, свеченоста започна со пречекување на знамето и знаменскиот вод по што ќе следеа пригодни говори на претставници на МО и на АРМ.

Заменик министерот за одбрана Емил Димитриев напомена дека во услови на сложена ситуација во Авганистан, безбедното враќање на војниците е голем успех:

- Ова е веќе шеста ротација и преминува во еден вид на традиција, морам да кажам дека сум горд на секој од вас, бидејќи несебично уште еднаш покажавте дека Македонија има способна армија која може да учествува и во воено-мировни операции.

Командантот на Првата механизирана пешадиска бригада, бригадниот генерал Димче Петровски исто така ги поздрави војниците:

- Иако сме мала армија, со капацитетите и знаењето кое го имаме можеме слободно да кажеме дека сме важен сегмент од мировната мисија „ИСАФ“ во Авганистан. Ова е огромно човечко и професионално искуство кое станува се посилно, со секое заминување и враќање на континегнтите на АРМ во Авганистан.

На свеченоста присуствуваа и заменик началникот на Генерал штабот на АРМ генерал-мајор Насер Сејдини, командантот на Здружената оперативна команда бригаден генерал Горанчо Котески, градоначалникот на Штип д-р Зоран Алексов и роднини и пријатели на војниците.

АРМ во мисијата ИСАФ, во Авганистан, во периодот јануари - јули 2011 година, учествуваше со контингент од 149 припадници на Првата механизирана пешадиска бригада најстар национален претставник, двајца штабни офицери и пет старешини во составот на тимот за оперативно менторство и врска. Контингентот на АРМ во изминатите шест месеци беше ангажиран за извршување на сложени задачи како што се целосно обезбедување на командата на ИСАФ во Кабул, обезбедување на објекти од витално значење за животот на населението во Авганистан, борбено обезбедување на комуникации и области во зоната на одговорност и друго.

Македонските мировници задачите ги извршуваа во исклучително тешки теренски и временски услови, при што покажаа висок степен на стручност, професионализам и физичка подготвеност. Од страна на командата на ИСАФ и надлежните високи команди на НАТО, ангажирањето на припадниците на АРМ во повеќе наврати беше високо оценето, што се должи на високиот степен на обученост, но и на покажаната компатибилност и оперативна способност за време на извршувањето на мисијата.