Како дел од манифестацијата „Десет дена Крушевска Република“ која се одржува по повод Илинденското востание во Крушево, пред присутните посетители се претстави Општина Штип.

Во времетраење од два часа на градскиот плоштад во Крушево, своја уметничка програма првенствено имаше проф. Горан Ангелов од Факултетот за музичка уметност со групата „Етникум“. Со песни со патриотска содржина, но и изворни песни од штипското подрачје се претставија членовите на Градскиот хор во Штип.

Сплетот „Водарки“ го изведоа членовите на КУД „Ристо Донев-Учителот“, кои со изведбата ја пленија публиката. Следуваше „Кикиритков-Опашинов бенд“ со неколку отсвирени евергини. И за крај, како што искоментираа организаторите, следуваше најголемото раздвижување на публиката во сите 10 дена славење. Главен виновник за тоа беше штипската музичка и актерска легенда, Раде Рогожаров, кој преку изведбата на неколку негови песни, успеа да ја поттикне целата публика да се фати на оро.

Од двочасовната програма беа задоволни сите: и публиката, и оранизаторите и учесниците.

Ова е прво претставување на Општина Штип во Крушево.