Во петокот во Штип беше отворена манифестацијата „Пастрмалијада 2011“. На отворањето присуствуваа огормен број на граѓани од Штип, соседството како и од други држави.

- Ова е вкус кој се памети а сега откако нашата пастрмалија е брендирана можеме слободно да кажеме дека имаме уникатен производ, специфичен само за овој град – изјави во обраќањето, градоначалникот Зоран Алексов.

Специјален гостин на „Пастрмалијадата“ во Штип беше селекторот на Македонската кошаркарска селекција Марин Докузовски:

- Ние во Литванија цело време јадевме варена риба, бевме на диета и да ви кажам едвај чекав да дојдам тука и да јадам пастрмалија. Штипската ми е омилена и многу сум благодарен за поканата – изјави Докузовски кој му подари баскет на градоначалникот потпишан од сите кошаркари.

Докузовски пак за возврат доби плакета за заслуги со симболот на градот. Заеднички со неколку илјади граѓани на улицата „Ванчо Прке“ каде се одвива манифестацијата, тој ја испеа „Излези момче горе на тераса“. На крајот, доби и посебен подарок од угосителите во ресторанот „Казабланка“ – пастрмалија во форма на баскет !

Пастрмалијадата ќе трае до недела а најголем број посетители се очекуваат вечерва.