Со вчерашниот трети ден, заврши петтото издание на „Штипска пастрмалијада 2011“.

На манифестацијата учествуваа над 40-тина субјекти од кои околу 35 угостители и 6-7 винарии. Секоја вечер имаше богата културно-уметничка и забавна програма која подразбира настап на поп и фолк-етно состави.

Ова беше втор пат „Штипската пастрмалијада 2011“ да биде организирана на улицата „Ванчо Прке“ која уметнички е позната како „Улица на пастрмалиите“. Во изминатите три дена, штипските угостители три дена продаваа пастрмалии на голем број заинтересирани штипјани но и на голем број посетители од страна. Меѓу гостите доминираа посетители од Скопје, Велес, Пробиштип, Радовиш, Куманово,Битола, Прилеп и други градови.

На „Штипска пастрмалијада“ за прв пат беше доделена и награда за најдобро украсен штанд. Плакетата ја доби штандот на ресторанот „Казабланка“ а на традиционалната трка на келнери, најбрз беше по втор пат келнерот од ресторан „Сутјеска“ – Јован Велевски.

Новина беше што од годинава, „Штипската пастрмалија„ е брендиран производ, што подразбира заштитен квалитет, рецепт и име.

Во исто време на градскиот плоштад во изминатите три дена се оддржуваше „Фестивалот на медот“ и „Денови на  занаетчиството“, каде медарите и занаетчиите ги претставија своите производи. На тој начин, манифестацијата беше збогатена со уште два настана.

Денес улицата ќе биде расчистена а на дополнителна средба помеѓу угостителите и градоначалникот на Штип, д-р Зоран Алексов ќе бидат разгледани впечатоците за слабостите и позитивните ефекти со цел идната година оваа манифестација да биде уште подобра.

Кој пропуштил...нека повели догодина !