Вечерва во 22:00 часот започнува 26-тото издание на фестивалот на музика „Макфест 2011“. Двете полуфинални вечери ќе започнат од 22:00 часот додека финалето ќе биде во сабота со почеток во 21:00 часот.

Првата прес конференција се оддржа денес на пладне. Уметничкиот директор Кристијан Габроски истакна дека фестивалските подготовки влегуваат во завршна фаза:

- Сцената е готова, звукот и визуелниот дел се проверуваат, ќе следи генерална проба со што влегуваме во финалните активности пред директниот пренос. Песните се навистина добри, но за тоа ќе оцени публиката која ќе го следи фестивалот.

Преносот на фестивалот по втор пат ќе го реализира „Канал 5“ телевизија. Годинава ќе бидат изведени 38 композиции од кои 18 се дебитанти поделени во двете полуфинални вечери со деветмина изведувачи, додека во вториот дел ќе бидат застапени 20-тмина изведувачи кои веќе се етаблирани на македонската забавна сцена.

Годинава реализатор на фестивалот е фирмата „Нова Икс Идеа“ од Скопје која се пријави на јавниот конкурс за организирање на фестивалот, во име на Општина Штип која останува и понатаму сопственик на фестивалот.

Билетите за првата и втората вечер, како и блокот влезници се во продажба на билетара на НУ Дом на култура „Ацо Шопов“ од Штип од 12:00 до 14:00 часот и од 17:00 до 22:00 часот.