Во општина Штип минатиот викенд беше разгледана студијата за оцена на влијание врз животна средина за проектот: Изградба на автопат Миладиновци - Свети Николе - Штип.

Согласно членовите 88 и 83 од Законот за животна средина и уредбата за определување на проекти и критериуми врз основа на кои се утврдува потребата за спроведување на постапка за оцена на влијание вез животна средина (Сл.Весник на РМ бр 74/2005) беше предвидено да биде разгледана студијата за оцена на влијание врз животна средина за проектот „Изградба на автопат Миладиновци - Свети Николе – Штип“.

Автопатот Миладиновце-Свети Николе-Штип, треба да биде долг околу 53 километри.

Сашка Богданова од Агенцијата за магистрални и регионални патишта кажа дека во студијата за оцена врз животната средина е конастатирано дека изградбата на автопатот Миладиновце-Свети Николе-Штип ќе нема влијание врз животната средина.

- Која било изградба на автопат не може да остане незабележана или незначајна во однос на животната средина, но овде станува збор за делница, која релативно е пријателски настроена кон животната средина, а од причина што финалната траса  минува и ги избегнува сите можни влијание врз животната средина. Трасата поминува низ земјоделско земјиште кое е со низок квалитет, објаснува Богданова.

Според неа, Агенцијата за магистрални и регионални патишта забрзано работи на обезбедувањето на техничката документација за новиот автопат. Со изградбата на автопатот градовите од Источна Македонија и Штип, како центар на регионот, ќе имаат посигурен и побрз транспорт на луѓето  и на индустриските и земјоделски производи.