Општина Штип денес достојно ја одбележа 138-годишнината од раѓањето на идеологот на македонското револуционерно движење, Гоце Делчев.

Прво во црквата Света Богородица беше одржана панахида во чест на револуционерот. Панахидата ја одржа Митрополитот Брегалнички г.Иларион.

Потоа пред рељефот на Гоце Делчев на подрачното училиште во Ново Село кое е во фаза на реновирање и во кое своевремено учителствувал самиот Делчев, пригодна реч одржа претставник на штипскиот универзитет. Потоа беа положение свежи букети цвеќиња. Градоначалникот на Штип, д-р Зоран Алексов придружуван од советници положи свежо цвеќе а тоа го сторија и градоначалникот на Карбинци, Васил Богдански, делегација од Универзитетот „Гоце Делчев“ со деканот на педагошкиот факултет Кирил Цацков, потоа од НУ Библиотека „Гоце Делчев“ и други. По завршувањето на рециталот на учениците од ОУ „Гоце Делчев“, делегациите положија свежо цвеќе и пред спомен-бистата на револуцонерот Делчев во кампус 2 на УГД (Педагошки факултет).

Одбележувањето заврши со промоција на монографијата: „Од читалиште до национална установа“, посветена на дејноста на библиотеката „Гоце Делчев“.