По еден месец престој во Аргентина, велосипедот на Зафиров не издржа!! Се расипа! Заради тоа, штипјанецот минатиот викенд одморал, додека велосипедот бил на поправка. Денес велосипедот ќе биде ставен во функција.

Сепак, бројот на километрите кои штипјанецот Дејан Зафиров ги поминува како дел од неговиот маратон Јужна Америка 2010 се зголемува. По минатонеделните 1383 километри, Зафиров на 25 февруари стигнал до Нејкуин во истоимената провинција. Зад него се 1610 километри!

Денес се очекува да продолжи со рутата и според планираното, на 4-ти март да влезе на територија на Чиле. Ниту земјотресот кој се случи не може да го попречи во остварувањето на целта.

- Продолжуваме полека кон Запала. Од Нејкуин до Запала има околу 184 километри, тоа е на пат кон граничен премин и влез во Чиле, ама веќе е планински терен. Би требало да влезе во Чиле на 4-ти март, со надеж исто така дека и работите со земјотресот ќе бидат нормализирани. - вели неговата придружничка Билјана Клекачкоска.

Нејкуин е една од точките каде Зафиров можеби ќе влезе во Чиле а планира да контактира и со амбасадорот на Чиле во Загреб за дополнителни информации по земјотресот. Во моментов нема опасност од последиците од земјотресот бидејќи се уште е на територија на Аргентина.

Сега му претстои потешкиот дел од велосипедскиот маратон, бидејќи ќе се движи северно кон финалната цел Мендоза, а пред себе има планиснки превој кој треба да се помине.

Само за потсетување, маратонот има околу 4000 километри од стартната точка Буенос Аирес (Аргентина) на источниот брег до Мендоза (Чиле) на западниот брег. Велосипедскиот маратон е тежок ако се знае дека Зафиров има протеза на левата потколеница и оштетен нерв на десното стапало. Сепак по подвигот од над 2000 километри од Штип до Ница (Франција) минатото лето, Зафиров сега е пред многу поголем предизвик.

За комплетирање на проектот, Зафиров и понатаму има потреба од финансиска поддршка заради што се апелира сите заинтересирани субјекти доколку се во можност да го подржат проектот со издвојување на средства на ж-сметка:

Здружение на граѓани ГАИА:

т-ска: 300000003019355

а.д. Комерцијална банка-Скопје