Денес во Штип престојуваше амбасадорот на САД во Македонија, г. Филип Рикер. При посетата, амбсадорот Рикер го отвори американското катче на универзитетот „Гоце Делчев“. Станува збор за културен сегмент кој ќе им овозможи на посетителите да дознаат повеќе работи за американската култура, преку директен контакт со содржини кои се однесуваат на САД.

Ректорот на штипскиот универзитет, Саша Митрев истакна дека американското катче ќе биде особено важно за студентите кои ќе сакаат да дознаат повеќе за американскиот високо-образовен систем со можности за размена или продолжување на студиите во САД.

Министерот за образование и наука Никола Тодоров изјави дека отворањето на американското катче е само иницијатива додека зацврстувањето на врските со САД е токму во рацете на студентите.

Амбасадорот Рикер најави дека процесот на отворање на вакви културно-информативни катчиња ќе продолжи и понатаму.

Амбасадорот Рикер оствари средба и со градоначалникот на Штип, д-р Зоран Алексов. Разговараа за актуелните проекти на општината како и за идните планови кои се од особено инфраструктурно значење за општината.