Денес во Пробиштип беше избран најпријателскиот градоначалник за ромската популација во Македонија, како дел од кампањата Типичен ром? Титулата ја понесе штипскиот градоначалник д-р Зоран Алексов.

НВО РРОМА изминатиот месец ги посетуваше општините низ Македонија а посебно во регионот со цел утврдување на замислите, идеите и активностите на градоначалниците во поглед на остварување на правата на ромите и нивна интеграција во општеството. Во конкуренција беа 6 градоначалници од регионот. Градоначалникот на Штип, од максимални 36 поени, добил 34 од страна на стручната комисија која ги оценувала апликациите.

Како што беше посочено, апликацијата на Штип била најпотполна и со голем број на информации кои се однесуваат на решавањето на дел од проблемите на ромската заедница, вклучувајќи тековни но и идни проекти поткрепени со докази. При тоа беше поздравена заложбата за подобрување на условите за живот на ромите во Штип, реконструкцијата на улиците за ромската популација и низа други проекти кои се дел од активностите на штипскиот градоначалник.

Градоначалникот д-р Алексов на 7 април 2010 ќе патува на вториот европски ромски самит кој ќе се одржи на светскиот ден на Ромите во Кордоба (Шпанија). Тој ќе биде претставник на Македонија и на самитот ќе зборува за решавање на ромските проблеми не само на локално, туку и на државно ниво.