Во организација на општина Штип, денот на шегата 1-ви април се одбележа со традиционалната Априлијада. На одбележувањето на светскиот ден на шегата учествуваат над 862 деца. Станува збор за првачињата од штипските основни училишта и децата од поголемите групи од детските градинки.

Но убавото време измами и бројни родители кои со своите најмили ја посетија парадата на маски.

Своите маски децата - првачиња и поголемите групи од детските градинки ги покажаа во месноста Кртеке каде организирано допатуваа.

Децата од ОУ „Тошо Арсов“ беа организатори на малата приредба која се одржа, а по завршувањето на истата, откако секое училиште и детска градинка ги претстави своите маски, беа наградени најдобрите три. Годинава наградите ги добија маските Пролет на ОУ „Тошо Арсов“, маската Тиква на детската градинка „Вера Циривири – Трена“ и маската Бизнисмен на ОУ „Гоце Делчев“. Наградите ги доделува Општина Штип.

По приредбата дечињата - учесници со своите маски продефилираа низ централното градско подрачје до домот на културата каде се одржа продажба на велигденски јајца.

По завршувањето на продажбата, децата беа примени од Претседателката на Советот на Општина Штип, Сузана Николовска.