За време на викендот Штип беше домаќин на 34-тиот меѓународен турнир во борење слободен стил „Македонски бисер“.

Активностите започнаа во петокот со техничка конференција и семинар за судии по што учесниците беа подложени на лекарска контрола и мерење.

Клучните натпревари се одиграа во сабота претпладне со елиминационите натпревари а финалните борби се одиграа по 18 часот.

Трофејот годинава замина во рацете на Дејан Богданов, борач на БК Балканец. Тој во категоријата до 84кг ги тушираше сите противници а во финалето го порази бугарскиот олимпиец Владимир Петков. На турнирот учествуваа борачи од 9 држави.

Претходно на свеченото отворање на кое присисуствуваа клучните личности од светот на борењето, градоначалникот на Штип одржа говор посветен на 34-тиот боречки турнир Македонски бисер.

Тој напомена дека одржувањето на турнирот се случува во вистинско време со оглед на тоа што паралелно со натпреварот БК Балканец од Штип го одбележа 50-годишниот јубилеј. За активностите во промоција и подршка на борењето во Штип, Советот и Градоначалникот добија медали и признанија. Наградите ги примија претседателката на Советот, Сузана Николовска и градоначалникот д-р Зоран Алексов.

Инаку организатор на манифестацијата беше Федерацијата на боречки спортови на Македонија а технички организатор БК Балканец 2008. Со-организатори беа Општина Штип, Агенција за млади и спорт, МОК и Сојуз на спортски федерации на Македонија.