Со театарската претстава „Баханалии“ на Горан Стефановски а во режија на Наташа Поплавска, свечено бепе отворено 25-тото јубилејно издание на штипско културно лето.
Театарската претстава беше во изведба на Народниот театар од Велес. ШКЛ со свечен говор го отвори градоначалникот на Штип, д-р Зоран Алексов, кој меѓу другото истакна дека Штип е познат како град на културата и на вистинските вредности.

Според него, 25-годишниот јубилеј е манифестација која со генерации била пренесувана заради што секоја локална самоуправа има несебична одговорност да го продолжи тој пат на успех на ШКЛ.

-Наша тенденција не е само да одржуваме претстави, изложби, да правиме концерти и друго само заради опстојување на Штипско културно лето. Тоа е една од нашите мисии, но далеку поважно е од публиката да направиме уметнички квалитет кој ќе го надмине киќот кој не опкружува - истакна градоначалникот Алексов меѓу другото.

На годинашново ШКЛ кое инаку официјално започна на 22 јуни со ликовната изложба на Мирко Дончевски ќе бидат претставени вкупно 42 уметнички перформанси (изложби,промоции, театарски претстави, концерти, соло пеења и слично). На годинашново ШКЛ за прв пат се одвива т.н недела на детето која е претставена преку неколку театарски претстави за деца.

По претставата Баханалии, веќе во сабота штипјани имаа можност да ја погледнат претставата „Крпен живот„ на Стале Попов во режија на Владо Цветановски а во изведна на центарот за култура „Војдан Чернодрински„ од Прилеп.