Градоначалникот на Штип д-р Зоран Алексов потпиша меморандум за соработка со Здружението на пензионерите на Штип.
Договорот беше потпишан во просториите на Здружението на пензионерите (кај градски плоштад).

Со меморандумот се отвораат можности за соработка со пензионерското здружение во многу проекти меѓу кои за нив најважниот, изградба на дом за стари лица.

- Се надевам дека со ова ќе тргнат конкретно работите околу домот за стари лица. Општината имаше во предвид неколку локации, но подоцна се покажа дека не се добри. Сега домот за стари лица е предвидено да се гради во Дузлакот и сметаме дека таа локација е најпогодна. Општината ќе ја подготви инфраструктурата и со помош на пензионерите а и по пат на јавно-приватно партнерство Штип ќе добие дом за стари лица-изјави градоначалникот Алексов.

Тим на Општина Штип од Одделението за локален економски развој изминатите месеци активно работеше на прибирање на податоци кои се однесуваат на домот за старци.

- Со заложба на градоначалникот, по многу средби дојдовме и до овој момент. Потпишувањето на меморандумот е важно за нас бидејќи означува своевиден старт на проектот за дом за стари лица, кој за нас пензионерите е моѓне важен-изјави Михаил Кралев, претседател на здружението на пензионери на Штип.

За потребите на проектот беше спроведена регионална анкета а добиените резултати за интересот за домот за стари лица ќе послужат при утврдувањето на капацитетите на објектот.