Денес во мала сала на Општина Штип се одржа прес конференција во врска со новиот еко-проект на Општина Штип насловен како „Со селектирање на отпадот до почиста средина“. На прес конференцијата говореше Борче Везенков (комунален инспектор) и координатор на проектот.

Според Везенков, станува збор за проект или циклус на едукации за селекција на отпадот кој ќе се реализира во повеќе фази. Во првата од нив ќе се реализираат еднодневни работилници-обуки на наставниот кадар и на учениците во градинките и во основните училишта. За таа цел изготвени се флаери, а едукациите ќе се реализираат со видео-бим презентации, за децата од преучилишна и училишна возраст да можат подетално да се запознаат со тоа, каков вид смет во кој сад се исфрла.

-Ќе се обидеме децата од предучилишна возраст да ги мотивираме преку цртежи и на практичен начин да добијат сознанија за значењето на садовите за отпад, со наша и со помош на воспитувачките да научат кој вид отпад (стакло, хартија, пластика) во кој сад треба да се фрла - додава Везенков.

Откако ќе се заврши со едукацијата во градинките, предвидено е да започне едукација за учениците во основните училишта. Учениците ќе бидат поделени во две целни групи – прва група од I до IV одделение и II група од V до VIII одделение.

Потоа, предвидени се циклус на радио и телевизиски емисии со кои и целокупната јавност ќе се запонае со активностите во целиот процес. Обуките во детските градинки и училиштата ќе се одвиваат во периодот до крајот на декември годинава, а со почетокот на наредната 2011 година ќе се елаборираат ефектите од едукативните работилници и поставувањето на садовите за селектирање на отпадот.