Мотоциклистичката федерација на Македонија во соработка со Сојузот на спортови од 3 до 5 септември го организира меѓународното мото рели „Македонија-Независност 2010“ кое традиционално 19 години се одржува по повод 8-ми септември, Денот на независноста на Македонија.

Мотоциклистичката колона денес патуваше низ 8 општини а во Штип помина во 14 часот. Моторциклистите привремено се одморија на градскиот плоштад.

Учесниците мотоциклисти беа пречекани од граѓаните и претставници на локалната самоуправа. Пред учесниците во име на домаќинот, Општина Штип се обрати Димитар Џонов, советник и претседател на Комисијата за спорт.

-Сакам да и честитам на Мотоциклистичката федерација на Македонија за истрајноста и доследноста да го одржат ова мото-рели полни 19 години, бидејќи ваквите манифестации се особено важни за афримација на нашата земја, на нашиот град, особено ако се знае дека на нив присуствуваат не само луѓе од внатрешноста туку и од соседни земји-изјави Џонов.

За време на краткиот престој во Штип, учесниците беа почестени со ладни сендвичи и освежување по што го продолжија својот пат кон општина Радовиш. Мото-релито ќе заврши на 5-ти септември (недела) со рутата Охрид-Кичево-Скопје.

Станува збор за манифестација која е меѓу првите организирана во чест на независноста на Македонија и која единствено во континуитет се организира без прекин во Македонија полни 19 години. На мото-рели турата учествуваат голем број на мотоциклисти не само од Македонија туку и од соседните земји. Минатата година имаше гости од Германија,Холандија,Бугарија, Србија и други држави. Релито го обезбедува сообраќајна екипа на МВР.