Привршува изградбата на новата чешма (фонтана) во населбата Сењак. Екипи од двете јавни претпријатија интензивно го уредуваат просторот на аголот кај крстосницата од улиците „Сремски фронт“ и „Борис Крајгер“ (наспроти градежната парцела наменета за изградба на новиот станбено-деловен простор), каде е поставена чешмата.

Иницијативата за поставување на чешмата е на двете штипски јавни претпријатија.

Конкретно, ЈП „Исар“ за функционирањето на чешмата направи приклучок на вода и одвод до најблиската канализација, завршувајќи ги сите водоинсталатерски работи и канализациони приклучоци.

ЈП „Штип-проект“ ја изгради фонтаната и го направи партнерното уредување околу истата.

Ова е прва нова чешма од овој вид во последниов период. Нејзината изградба е со цел да ги подобри условите на граѓаните во тој дел од градот, поради зголемената фреквенција на граѓани посебно во летните ноќи.

Како што истакнуваат од јавните претпријатија - ова е еден вид тест за граѓаните. Доколку знаат да ги чуваат јавните добра, се планира изградба на нови вакви фонтани (пред „Зегин“ во центарот на градот и сл.)