Согласно одлуката на Владата на РМ за прогласување на кризна електроенергетска состојба и преземање на неколку превентивни мерки за одржување на стабилноста и сигурноста на електроенергетскиот систем на државата, следејќи ги препораките до општините во државата, Општина Штип ги известува граѓаните на Штип за следните преземени активности.

Утре, (вторник, 14-ти февруари 2012) ќе биде извршено ново темпирање на тајмерите за вклучување на уличното осветлување. Согласно истото, уличното осветлување ќе се вклучува во 18 часот а ќе се исклучува во 3 часот наутро. Со репрограмирање на тајмерите, Општина Штип ќе обезбеди заштеда на електрична енергија од уличното осветлување  од 4 часа дневно, бидејќи сега уличното осветлување се вклучува во 17 часот а се исклучува во 6 часот наутро.

Ги замолуваме граѓаните да бидат внимателни и претпазливи,посебно во периодот по 3 часот наутро, да внимаваат на своите движења со цел избегнување на можни последици. Одлуката која е донесена е во интерес на сите граѓани а согласно насоките на Владата за заштеда на електрична енергија и нејзино рационално трошење.

Воедно, Општина Штип упатува апел до приватните правни субјекти, доколку се во можност  да пристапат кон исклучување на светлосните реклами и останатите светлечки тела за кои сметаат дека нема да им го нарушат текот на работата и со тоа да придонесат во заштеда на електричната енергија.


Ви Благодариме за разбирањето
Општина Штип