Општина Штип се подготвува за акцијата „Ден на дрвото“ која ќе се одржи по 6-ти пат. Изминатите акции покажаа дека постои интерес кај граѓаните за пошумување на голините околу градот. Според информациите, во Штип во 6-тата акција ќе бидат засадени нови садници на површина од околу 46 хектари.

При тоа, најголем дел се обврска на Општина Штип (35 хектари) и истите ќе бидат засадени со садници од вработените во локалната самоуправа и од институциите кои се во нејзина надлежност.

Во акцијата ќе се вклучи и Универзитетот „Гоце Делчев“ кој на планината Плачковица, близу арехолошкиот локалитет Баргала ќе пошуми место со површина од 5.5 хектари наречено „Универзитетска шума“. Планирано е да бидат засадени листопадни дрва.

И шумското стопанство Серта ќе биде дел од оваа 6-та акција при што ќе засади садници во месноста Кавакалија кај Криви Дол на површина од 5 хектари.

Се очекува да биде утврден датумот, точната локација и бројот на садниците за шестата по ред акција „Ден на дрвото“.